Жарылыс кесірінен жапсарлас орналасқан көршілер де зардап шеккен
Алматыда жер үйде газ жарылып, бір адам зардап шекті. Ауыр жарақат алған 49 жастағы әйел ауруханада жан сақтау бөлімінде жатыр, деп хабарлайды КТК телеарнасы.
Оқыс оқиға кеше кешкісін болған. Төтенше жағдайлар қызметінің болжамынша, үйдегі табиғи газдың аузы ашық қалса керек. Ауаға тараған көгілдір отыннан жарылыс болып, баспананың тас-талқаны шығыпты. Апат орнына жеткен 10-нан аса құтқару қызметкері қирандының астында қалған үй иесін тапқан. Тіпті жарылыс кесірінен жапсарлас орналасқан көршісі де зардап шегіп отыр. Оның да баспанасының жанына қабырға құлапты. Күл- қоқысты жинап жүрген жалғыз баласы мен келіні енді аналарының амандығын тілеп отыр.
«Кеше кешке сағат 7-де бізге хабарласып, үйде газ жарылғанын айтты. Бірақ мұншалықты адам шошырлық жағдайда деп ойлаған жоқпыз. Тіпті анамыз ішінде қалып қойған екен. Жақында ғана жөндеу жұмыстарын жүргізіп, осында көшіп келіп, бірге тұруды жоспарлап жүрген едік», - дейді зардап шегушінің келіні Марина Колбасина.