Полиция оқиғаның барлық мән-жайын анықтап жатыр
Алматының Медеу ауданында түнгі патруль кезінде полиция күдік тудырған ер адамды тоқтатты. Тексеру барысында одан синтетикалық есірткі болуы мүмкін орама табылды, деп хабарлайды Azattyq Rýhy.
Алматы полициясының мәліметінше, Медеу ауданында түнгі патруль жүргізіп жүрген қызметкерлер күдікті әрекет танытқан ер адамды байқаған.
Тексеру кезінде ол киімінің қалтасында синтетикалық есірткі заты салынған орама бар екенін айтқан.
Оқиға орнына тергеу-жедел тобы шақырылды. Тәркіленген заттың нақты құрамын анықтау үшін сот-химиялық сараптама тағайындалды.
Ұсталған азаматтың сөзінше, есірткі затын тек жеке тұтыну мақсатында сақтаған.
Алайда полиция оқиғаның барлық мән-жайын анықтап жатыр. Сондай-ақ ер адамның есірткінің заңсыз айналымына қатысы бар-жоғы тексерілуде.
Алматы полициясы есірткіні заңсыз сақтау қылмыстық жауапкершілікке әкеп соғатынын еске салды.