Құтқарушылар дрон қолданды
Жамбыл облысының Шу ауданында малшыға көмекке шығып, із-түзсіз жоғалған жергілікті тұрғын аман-есен табылды. Түні бойы жүргізілген іздеу жұмыстарына заманауи технологиялар мен кинологтар жұмылдырылды, деп хабарлайды Azattyq Rýhy Төтенше жағдайлар министрлігіне сілтеме жасап.
Оқиға кеше кешке басталған. Әйел адам жайылымдағы малшыға қолғабыс ету үшін үйінен шығып, қайта оралмаған. Туыстары дабыл қаққан соң, ТЖМ құтқарушылары шұғыл түрде іздеу-құтқару операциясына кірісті.
Операцияға құтқарушылар, арнайы техника, кинологтар мен иісшіл иттерқатысты. Түнгі уақытта аумақты шолып шығу үшін ұшқышсыз ұшу аппараттары, яғни дрондар қолданылды.
Бүгін таңертең жүргізілген ауқымды іздеу жұмыстары оң нәтиже берді. Жоғалған әйел көрші фазендалардың бірінен табылды.
«Іздеу жұмыстарының нәтижесінде әйел адам бүгін таңертең көрші шаруа қожалығының аумағынан табылды. Оның денсаулық жағдайы қанағаттанарлық, медициналық көмек қажет болған жоқ», — деп хабарлады ТЖМ баспасөз қызметі.
Құтқарушылар өңірдегі ауа райының құбылмалылығын ескеріп, тұрғындарға жалғыз сапарға шықпауды және жақындарына бағыты туралы алдын ала ескертуді өтінеді. Әсіресе, ашық аспан астындағы мал шаруашылығымен айналысатын азаматтарға байланыс құралдарын үнемі жанында ұстау кеңес беріледі.