«ҚазАвтоЖол» тас жолдарда нөмірлерін әдейі жасырған көліктерді жаппай анықтап жатыр

«ҚазАвтоЖол» компаниясы трассаларда мемлекеттік тіркеу нөмірлерін әртүрлі айла-тәсілдер арқылы жасырған 900-ден астам көлікті анықтады, деп жазады Azattyq Rýhy.

Компанияның баспасөз қызметі таратқан ақпаратқа сүйенсек, «ҚазАвтоЖол» полиция департаменттерімен бірге тәртіп бұзған көліктерді анықтаған.

«Мемлекеттік нөмір белгісі — көлік құралының міндетті сәйкестендіру дерегі. Кірлеген нөмір оқылмай қалса, жүргізуші оны уақтылы тазалауға міндетті. Ал мемлекеттік нөмірді әдейі жасыру немесебұрмалау, сондай-ақ жалған немесе қолдан жасалған нөмір белгісін қолдану — Қазақстан Республикасының жол жүрісі қағидаларын және заңнамасын тікелей бұзу», - деп хабарлайды «ҚазАвтоЖол».

көлігіндегі мемлекеттік тіркеу нөмірі көрінбейтін немесе жалған нөмір таққан азаматтарға мынандай айыппұл салынады:

• 1-бөлігі: оқылмайтын, стандарт талабына сай емес немесе белгіленген орыннан тыс орнатылған нөмірлер — 5 АЕК (21 625 тг).
• 2-бөлігі: мемлекеттік нөмір белгілерінсіз басқару (сондай-ақ бірқатар жағдайларда тіркелмеген көлік құралын басқару) — 10 АЕК (43 250 тг).
• 2-1-бөлігі (бір жыл ішінде қайталап): 20 АЕК (86 500 тг) немесе 1 жылға көлік құралын басқару құқығынан айыру (сот шешімімен).
• 3-бөлігі: көлік құралына көрінеу жалған немесе қолдан жасалған нөмір белгісін орнату — жеке тұлғаларға 15 АЕК (64 875 тг) (лауазымды адамдарға және бизнес субъектілеріне айыппұл мөлшері жоғары).
• 4-бөлігі: көрінеу жалған/қолдан жасалған нөмірмен, сондай-ақ нөмірді жасыратын, бұрмалайтын не тануға кедергі келтіретін материалдармен/құрылғылармен жабдықталған нөмірмен басқару — 5 тәулікке дейін әкімшілік қамаққа алу және 1 жылға көлік құралын басқару құқығынан айыру (сот шешімімен).

«Нөмірді әдейі «жасыруға» бағытталған пленка, жапқыш, рамка-шторка секілді құрылғыларды қолдану немесе жалған нөмір орнату қауіпсіздік тәуекелдерін күшейтіп қана қоймай, қатаң әкімшілік жауапкершілікке, оның ішінде қамаққа алу және жүргізу құқығынан айыру сияқты шараларға әкелуі мүмкін», - деп ескертеді «ҚазАвтоЖол» мамандары.