Полиция күдіктіні жедел ұстады
Желіде Тараз қаласында болған оқиғаның видеосы тарады. Кадрларда ер адамның әйелді баланың көзінше ұрып-соққаны және оған агрессивті әрекеттер жасағаны анық көрінеді. Полиция күдіктіні жедел ұстады, деп хабарлайды Azattyq Rýhy.
Тараған видеожазбада әйелдің жерге құлап, қабырғасының қатты ауырғанын айтып шағымданғаны байқалады. Дегенмен, ер адам агрессиясын тоқтатпай, жәбірленушіні қайта орнынан тұрғызып, орындыққа отырғызады. Бұл әрекеттердің бәрі кішкентай баланың көзінше болған.
Жамбыл облысы Полиция департаментінің мәліметінше, құқық қорғау органдары оқиғаға қатысты ер адамның жеке басын жедел анықтады. Күдікті облыс орталығының 30 жастағы тұрғыны бодып шықты.
Ер адам барлық мән-жайды анықтау және тергеу әрекеттерін жүргізу үшін полиция бөліміне жеткізілді.
Полиция бұл іс бойынша ҚР Қылмыстық кодексінің 108-1-бабы (Денсаулыққа қасақана жеңіл зиян келтіру) бойынша қылмыстық іс тіркелгенін хабарлады.
«Қазіргі уақытта қажетті процессуалдық іс-әрекеттер кешені жүргізіліп, дәлелдемелер жинақталуда. Толық тергеу қорытындысы бойынша заңды және негізделген шешім қабылданады», – делінген хабарламада.
Тергеу мүддесіне сәйкес, ҚР Қылмыстық-процестік кодексінің 201-бабына сәйкес басқа мәліметтер жария етілмейді.