Петропавл мектебінде болған жағдайдан кейін облыс әкімі шұғыл тапсырма берді
Санитариялық-эпидемиологиялық бақылау департаменті өңірдегі барлық мектеп асханасына кешенді тексеру жүргізеді
Петропавлдағы Абай атындағы мамандандырылған қазақ мектеп-гимназиясынан шу шықты. Ата-аналар асханада жәндіктер жүргенін айтып шағымданды, деп хабарлайды Azattyq Rýhy.
Олардың сөзінше, бұл жағдайдан кейін балалардың денсаулығы нашарлаған. Ата-аналар тамақтандыру қызметін көрсететін жабдықтаушыны ауыстыруды талап етіп отыр.
Оқиғаға қатысты Солтүстік Қазақстан облысының әкімі Ғауез Нұрмұхамбетов жедел шара қабылдауды тапсырды.
«Әкімнің тапсырмасы бойынша СҚО Санитариялық-эпидемиологиялық бақылау департаменті өңірдегі барлық білім беру ұйымындағы мектеп асханаларына кешенді тексеру жүргізеді», - деп жазылған хабарламада.
СҚО әкімдігінің білім басқармасына мектеп директорының кәсіби құзыреттілігін анықтап, білім беру мекемесін басқару сапасына баға беру, сондай-ақ облыстағы барлық мектептегі тамақтануды ұйымдастыруға қатысты келісімшарттарды тексеру тапсырылды.
Бұл жағдай облыс әкімінің жеке бақылауында болады.
Еске сала кетейік, бұған дейін Алматыдағы №65 мектеп-гимназияның асханасының антисанитариялық жағдайы ата-аналардың ашуын туғызған болатын. Әлеуметтік желіде асхананың лас күйінде түсірілген фото-видеолар тарады. Онда қоқыс, лас ыдыстар мен көгеріп кеткен табақтар көрсетілген.
