Басқараманың мәліметінше, асфальтті қара балшыққа айналдырып жіберетін жүк көліктері жүріп жатыр
Солтүстік Қазақстан облысындағы Қазан ауылына аудан орталығынан келетін жеңіл көліктер жете алмай, лайға батып қалып жатыр. Azattyq Rýhy редакциясына жолданған бейнежазбаларда тіпті КАМАЗ тәрізді ауыр техниканың өзі иленген балшыққа батып, трактормен сүйреп шығарылғаны анық көрінеді. Жол бойымен жаяу жүруге мәжбүр болған адамдар да камераға түсіп қалған. Тұрғындардың айтуынша, күз бен көктемнің жауынды күндері және қар еріген уақытта аудан орталығындағы ауруханаға жету мұңға айналады.
Жағдайға қатысты түсініктеме алу үшін СҚО әкімдігінің «Жолаушылар көлігі және автомобиль жолдары басқармасына» жүгіндік. Басқарма өкілдері көктемгі тексеріс кезінде жолдың жағдайы жақсы болғанын айтады. Олардың мәліметінше, бұл мәселе алғаш рет көтеріліп отыр.
«КСТ-59 «Қазгородок – Горьковское» автомобиль жолының 62–203 шақырым аралығы жалпы ұзындығы 141 шақырымдық облыстық маңызы бар жол. Биылғы көктемгі тексеріс нәтижесі бойынша аталған учаске нормативтік жағдайда болды», – деді басқармадан.
Алайда тұрғындар мен жергілікті әкімдік жолдың нашарлауына бірнеше фактор әсер еткенін айтады. Восходское мен Горьковское ауылдарының арасында жөндеу жұмыстары басталған, ал Горьковское ауылында шекара заставасының құрылысы жүріп жатыр. Осы нысандарға қарай ауыр жүк тиеген машиналардың көптеп жүруі нәтижесінде жолдың беті бүлініп, асфальт опырылып, жол иленіп қалған.
Басқарма басшысы Ерден Шортыбаевтың айтуынша, жолмен күніне 60-80 тонна жүк таситын көліктер өтеді. Рұқсат етілген осьтік жүктемеден асыратын ауыр жүк машиналарының қозғалысына қатысты Көлік бақылау инспекциясына бірнеше рет хат жолданған.
«Көлік инспекциясына күнде хат жазамыз. Біздің оларға шара қолдануға құзыретіміз жоқ», – дейді ол.
Жүк көліктері жолды адам көргісіз халге түсіргеніне қарағанда, асфальттің сапасы өте нашар болған деген болжам жасауға болады.
«118-ші шақырымда, Қазан ауылының маңында жол жамылғысында ойықтар мен батып кету белгілері пайда болып, көліктердің қозғалысын қиындатқан. Қазіргі таңда мердігер ұйымдармен түсіндіру жұмыстары жүргізілді. Жолды қалпына келтіру үшін инертті материалдарды дайындау басталды», – деп хабарлады басқарма.
Редакция сұрау салғаннан кейін жолды жөндеу жұмыстары ертең, 29-шы қарашада басталатыны белгілі болды.