Нұр-Сұлтан әуежайының коды NQZ болып өзгерді

Бүгіннен бастап Нұр-Сұлтан қаласы әуежайының үш әріптік коды TSE таңбасынан NQZ болып өзгерді. Бұл туралы бүгін брифингте азаматтық авиация комитетінің төрағасы Талғат Ластаев айтты.

«NQZ - ұшулар картасында жаңа атау. Барлық жолаушыларды IATA берген жаңа кодпен құттықтаймын. Осы код Нұр-Сұлтан әуежайына тек жақсылық әкелсін... ТМД-ның және әлемнің басқа елдері де әуежай кодын өзгертуге талпыныс жасап келді. Бірақ IATA ұйымының принципі бойынша ол өзгертілмеуі тиіс. Бірақ біз жолын тауып, нәтижеге қол жеткіздік. Бұл өзгерістер 2019 жылдың 14 қазанында Варшава қаласында (Польша) IATA-ның барлық мүшелерінің қатысуымен Жолаушылар тасымалы стандарттары (Passenger Standards Meeting) кездесуінде қолдау тапты», - деді ол.

Енді NQZ коды барлық брондау жүйелерінде, отырғызу талондарында, багаж биркаларында және ақпараттық таблода көрсетіледі.

Елорда әуежайына берілген үш әріптік код NQZ таңбасының логикалық мәні бар. Мұндағы N - Нұр-Сұлтан қаласы мен Назарбаев әуежайының, QZ - жаңа әліпби бойынша Қазақстанның қысқартылған нұсқасын білдіреді.

Еске салсақ, қала әуежайына TSE коды 1961 жылы Целиноград атымен байланыстырып берілген. Халықаралық әуе көлігі қауымдастығының (ИАТА) 2020 жылғы 6 сәуірде Нұрсұлтан Назарбаев халықаралық әуежайының қолданыстағы TSE үш әріпті кодын NQZ-ге өзгерту туралы түпкілікті ресми шешім қабылдады.

Абай Сейфулла, Нұр-Сұлтан