Сағат белдеуін өзгерту экономикалық тұрғыдан орынды деп санайды министр
Бұл туралы сауда және интеграция министрі Арман Шаққалиев мәлімдеді, деп хабарлайды Azattyq Rýhy.
«Сағат белдеуін өзгерту туралы шешім ғылыми негізделген және экономикалық тұрғыдан орынды», - деді ол Үкімет отырысында.
Премьер-министр Олжас Бектенов Үкімет бұл шешімді қолдайтынын атап өтті.
«Уақыт белдеуі туралы шешім қабылдағанда арнайы құрылған ведомствоаралық жұмыс тобының есебінде көрсетілген ғылыми негізделген дәлелдер пайдаланылды. Бұл жұмыс тобының құрамына Парламент депутаттары, мемлекеттік және жергілікті органдардың өкілдері, ғалымдар, сарапшылар, институттар мен қоғамдық бірлестіктер – барлығы алпыс адам кірді. Табиғи уақытты жақтаушылардың халықаралық альянсы Үкіметтің орталық және шығыс облыстар үшін UTC+5 сағат белдеуін бекіту туралы шешіміне оң қорытынды берді», - деді Шаққалиев.
Министрдің айтуынша, Қазақстан аумағының басым бөлігі іс жүзінде бесінші сағат белдеуінде орналасқан. Сол себепті UTC+5 еліміз үшін жаңа белдеу емес, керісінше тарихи тұрғыдан ақталған уақыт белдеуіне оралу.