Смайылов жылыту маусымына бастапқы дайындықтың бар екенін айтты
Үкімет отырысында Премьер-министр Әлихан Смайылов жылыту маусымына дайындық жайлы айтты, деп хабарлдады Azattyq Ruhy.
«Жылыту маусымының басталуына өте аз уақыт қалды. Солтүстік және шығыс өңірлерде жылыту маусымы ауа-райына байланысты мерзімінен ерте басталуы мүмкін. Көріп отырғанымыздай, бүгінгі таңда жылыту маусымын бастау үшін бастапқы дайындық бар. Сонымен бірге, кейбір жылу көздерін жөндеу жұмыстары уақытында аяқталмай қалуы мүмкін», - деді Смайылов.
Ол атағандай, Теміртау қаласының 2-ші Жылу электр орталығында №4-ші қазандықты жөндеу қазан айының соңына дейін ұзартылды.
«Жезқазған Жылу орталығындағы №4 қазандықты жоспарлы жөндеу әлі аяқталған жоқ, ал №9 қазандықта жұмыстардың небәры 4% ғана орындалған. Абай, Қостанай, Шығыс Қазақстан, Жамбыл облыстарының энергия кәсіпорындарында жөндеу жұмыстары кестеден кешігіп жүргізілуде. Сонымен қатар, жылыту маусымының басында қазандықтарға түсетін жүктеменің төмен болатынын ескерсек, бұл үйлердегі температура көрсеткіштеріне әсер етпеу керек. Аталған өңір әкімдері Энергетика министрлігімен бірге жөндеу жұмыстарына күнделікті мониторинг жүргізіп, алдағы маусымда қажетті жылу беруді қамтамасыз етуі тиіс. МАЭК-те №3 энергоблокты жоспарланған күрделі жөндеу 2024 жылға ауыстырылды, бүгінде №2 энергоблокты авариялық жөндеу жүргізілуде», - деді ол.
Смайылов атағандай, өткен аптада ол Маңғыстау облысында болып, МАЭК-тегі жөндеу жұмыстарының барысымен танысқан.
«Өңір әкімдігі жөндеу жұмыстарының аяқталуы мен кәсіпорынның тұрақты жұмысын ерекше бақылауда ұстауы қажет», - деді ол.
Авторы: Аягөз ҚҰРМАШ