Қытайға ауылшаруалығы өнімдерін экспорттайтын қазақстандық кәсіпорындар саны көбейді

Жыл басынан бері ҚР Ауыл шаруашылығы министрлігі ҚХР-ға өнім экспорттауға құқығы бар кәсіпорындардың реестріне тағы 200-ге жуық АӨК өнімін өндірушілерді енгізді. Қазір тізімге енген Қазақстанның 741 кәсіпорны бар.

2019 жылы ҚХР-ға Қазақстанның ауыл шаруашылығы өнімінің экспортын арттыру үшін ҚР Ауыл шаруашылығы министрлігі мен Қытайдың бас кеден басқармасы өсімдіктер карантині саласындағы өзара түсіністік пен ынтымақтастық туралы меморандумға қол қойды. Осы келісім негізінде 10-ға жуық фитосанитариялық талаптың хаттамасына қол қойылды.

«Қытайдың бас кеден басқармасымен жемісті ынтымақтастық жұмыстардың нәтижесінде Қазақстанның 741 кәсіпорны Қытайға агроөнеркәсіп кешені өнімдерін экспорттаушылар реестріне енгізілді. 2021 жылдың қаңтар-ақпан айларында ҚР Ауыл шаруашылығы министрлігінің кепілдігімен соя бұршақтарын, жоңышқа, арпа, жүгері, бидай ұны мен кебек, зығыр тұқымдарын өндіретін және қайта өңдеумен айналысатын 195 кәсіпорын тізімге қосылды», - делінген АШМ баспасөз қызметі таратқан ақпаратта.

Қазір ҚР Ауыл шаруашылығы министрлігі бұршақ, мақсары, жасымық, картоп, жом, шрот сияқты өнімдерді сату үшін экспортқа жол ашу келіссөздерін жүргізіп жатыр.

Айта кету керек, Қытайға бидай жөнелтуге құқығы бар элеваторлар мен астық қабылдау кәсіпорындарының тізімі де жаңартылды.

Тізімде 120-дан астам пункт бар. Оған Ақмола облысының 54 кәсіпорны, Қостанай облысының 30, СҚО-ның 34, Павлодар облысының 3 кәсіпорны кіреді.