Өткен аптада азық-түлік бағасы төмендеді

Сауда және интеграция министрлігі әлеуметтік маңызы бар азық-түлік тауарлары бағасының өсу қарқыны бәсеңдеп жатқанын мәлімдеді, деп хабарлайды Azattyq Rýhy.

Ұн бағасы 1,7%-ға төмендеген

Өткен аптада бірқатар азық-түлік өнімінің бағасы төмендеді. Атап айтқанда:

• жұмыртқа 1,2%-ға,
• пияз 0,8%-ға,
• сәбіз 0,6%-ға,
• рожки мен күріш 0,1%-ға арзандады.

Сонымен қатар жыл басынан бері ұн бағасы 1,7%-ға төмендеген.

«Өңірлер арасында  баға индексінің төмендеуі Түркістан облысында – 0,2%, Батыс Қазақстан және Солтүстік Қазақстан облыстарында – 0,1 тіркелді. Ал Алматы, Астана қалаларында, сондай-ақ Шығыс Қазақстан, Жамбыл, Алматы, Қостанай және Абай облыстарында баға индексі өзгеріссіз, нөлдік деңгейде қалды», - деп жазылған хабарламада.

Өңірлік комиссиялар анықтаған әлеуметтік маңызы бар азық-түлік тауарларына баға белгілеуді бақылау мақсатында  белгіленген 15%-дық шекті сауда үстемесін асыру  фактілері бойынша 1 872 әкімшілік іс қозғалды.

655 мәрте заң бұзылған

6 100-ден астам тауар жеткізу тізбегіне талдау жүргізілді. Соның ішінде 655 жағдайда бәсекелестік заңнамасын бұзу қаупі анықталды. Бұл деректер нақты шаралар қабылдап, бақылауды күшейтуге негіз болды.

«Әлеуметтік маңызы бар азық-түліктің қолжетімділігін қамтамасыз етудегі тиімді құралдардың бірі – ауыл шаруашылығы жәрмеңкелері. Жыл басынан бері еліміздің өңірлерінде фермерлік өнімдер делдалсыз, тікелей сатылатын 3 мыңға жуық жәрмеңке ұйымдастырылды», - деп толықтырды министрлік.

Сонымен қатар баға тұрақтылығын қамтамасыз ету және нарықты үздіксіз өніммен қамту мақсатында бизнес өкілдерімен және салалық қауымдастықтармен тұрақты диалог жүргізіліп жатыр.