Ол редакция тілшісіне дәл осы бағада жұмыртқа сататын дүкеннің мекен-жайын беремін деп уәде етті
Сауда және интеграция министрі Арман Шаққалиев Қазақстанда 10 жұмыртқа 535 теңге екеніне сенімді, деп хабарлайды Azattyq Rýhy.
Яғни, министрдің есебінше, қазір бір жұмыртқаның бағасы 53,5 теңге.
«Жұмыртқаның бағасы 535 теңге. Мен осы бағада жұмыртқа сататын дүкеннің мекен-жайын беремін», - деді Шаққалиев үкімет отырысынан кейінгі брифингте.
Оның үкіметтегі әріптесі, яки, ауыл шаруашылығы вице-министрі Азат Сұлтанов оның сөзін түсіндірмек болып, әлекке түсті.
«Жұмыртқаның әртүрлі категориясы болады. Мысалы, С0, С1, С2. Осының ішінде С1 категориясындағы жұмыртқаның бағасы 535 теңге. С0 дегеніміз ең үлкен жұмыртқа, оның бағасы қымбат. Сондықтан, сатып аларда сыртына қарау керек», - деді Азат Сұлтанов.
Шаққалиевтің сөзіне қанша сенгіміз келсе де Астанадағы супермаркеттердің арасынан 10 жұмыртқаның бағасын қарап, арасынан 535 теңгені таба алмадық.
Мәселе, Clever market интернет дүкенінде С1 категориясындағы 15 жұмыртқаның бағасы 1 017 теңге болып тұр. Яғни, бір жұмыртқаның бағасы 67,8 теңге. Ал, 10 жұмыртқа дәл осы дүкенде 678 теңгеге сатылып жатыр.
Ең танымал Magnum дүкені 10 жұмыртқаны 699 теңгеге, Arbuz қосымшасы 15 жұмыртқаны 1050 теңгеге сатып жатыр. Яғни, бұндағы бір жұмыртқаның бағасы 70 теңге болып тұр.