Абайдың шығармалары 10 тілге аударылады. Бұл туралы ҚР Мәдениет және спорт министрі Ақтоты Райымқұлова айтты, деп хабарлайды ҚазАқпарат
«Алдағы жылы Әл-Фарабидің 1150 жылдық, Абайдың 175 жылдық мерейтойларын атап өтеміз. Президент Қасым-Жомарт Тоқаев мерейтой барысында бос ысырапшылыққа жол бермей, ғұлама тұлғалардың еңбектерін халық арасында кеңінен дәріптеуді тапсырған еді. Қыркүйек айының басында Абай атамыздың 175 жылдық мерейтойын атап өту жөніндегі мемлекеттік комиссия отырысы өтті», - деді министр Орталық коммуникациялар қызметінде өткен брифингте.
Ол мерейтой аясында өткізілетін шаралар жобасы туралы айтып өтті.
«Абайдың толық шығармаларын 10 тілге аударып, басып шығармақпыз. Бұдай бөлек Абайдың өмірі, шығармашылығы, мұрасы және қазақ мәдениетін дамытудағы рөлі туралы 3 деректі фильм түсіріліп, түркітілдес елдерге көрсетілмек. Келесі жылдың басынан «Ұлы даланың ұлы ақыны» атты халықаралық поэзиялық, әндер және күйлер фестивалін өткізбекпіз. Біз мерейтой дегенде бір күндік емес, жүйелі, мазмұнды және ұзақ мерзімді жобаларға басымдық беруді жөн деп санап отырмыз», - дейді ол.
Еске сала кетсек, бұған дейін ҚР Мәдениет және спорт министрі кітапхана, театр, музей қызметкерлерінің жалақысы өсетінін туралы айтқан болатын.