Астанада киіз үй тігуден шеберлік сабағы өтті

Астана қаласының Байқоңыр ауданында Наурыз мейрамын тойлаудың онкүндігі ауқымды түрде аталып өтіп жатыр. Аудан әкімдігінің бастамасымен ұлыстың ұлы күні қарсаңында елордада алғаш рет «Асыл мұра – киіз үй» атты Киіз үй құрудан шеберлік сыныбы бастау алды, деп хабарлайды Azattyq Ruhy.

Аталған шеберлік сыныбы Наурызнаманың онкүндігі аясындағы Мәдениет және ұлттық салт-дәстүр күнінде Өндіріс тұрғын алабында жалғасын тапты.

Іс-шараның басты мақсаты – ұлттық құндылықтарымызды ұлықтау, жастарға көне салт-дәстүріміз бен қазақтың ұлттық баспанасының мән-мағынасын, маңызы мен ерекшелігін дәріптеу.

Жиын барысында белгілі этнограф Ақеділ Тойшанұлы мектеп оқушыларына киіз үйдің тігілуін, құрылымын егжей-тегжейлі түсіндірді. Мұндай шараға алғаш қатысқан жастар да өздерінің сұрақтарын қойып, қазақы үйдің тігілу барысына қатысты, оның ерекшелігімен әрі маңыздылығымен танысты.

Осылайша, атаулы күні мәдениет саласының қызметкерлерімен 8 қанатты киіз үй тігілді. Жұмыс барысын өз көздерімен көрген жастардың қуанышы тым ерекше.

Сондай-ақ, іс-шараға ҚР еңбек сіңірген қайраткері, әнші Досымжан Таңатаров қатысып, барша қауымды келе жатқан мейраммен құттықтап, әннен шашу шашты.

Ұлттық құндылықтарымызды насихаттайтын рухани-танымдық шараға елорданың БАҚ өкілдері де белсенді атсалысты.

Аталған рухани-танымдық шара өз жалғасын табатын болады.