Қазақстанда алғаш рет Диснейдің «Жұлдыздар шеруі» TV-форматта көрсетіледі

Бүгін Орталық Коммуникациялар қызметі алаңында Disney-дің «Жұлдыздар шеруі» киноконцертінің презентациясы өтті.

Қазақстанда алғаш рет Disney-дің «Жұлдыздар шеруі» TV-форматта көрсетіледі. Қазақстанның танымал әншілері – Данияр Өтеген, Адам, Кентал, Данэлия Тулешова, Ерден Жақсыбек, Жарқынай Ханайым, Балжан Бидаш, Берік Бердекеев, Әбілқайыр Жұмабай және Наргиз Кудренова үлкен симфониялық оркестрдің сүйемелдеуінде Disney мультфильмдеріндегі ең сүйікті әндерді қазақша орындайды.

Атап айтқанда, «Сұлу мен Құбыжық»/«Красавица и Чудовище», «Мулан», «Аладдин», «Арыстан Патша»/«Король Лев», «Покахонтас», «Моана», «Ханшайым мен құрбақа»/«Принцесса и лягушка», «Зверополис», «Су перісі»/«Русалочка», «Рапунцель», «Мұзды өлке»/«Холодное сердце» секілді анимациялық фильмдердің саундтректері шырқалады.

«Қазақстанда алғаш рет «Жұлдыздар шеруі» киноконцерті телевизиялық форматта өтеді. Бұл - әлемге әйгілі Disney киностудиясымен «Болашақ» корпоративтік қоры көпжылдық ынтымақтастығының нәтижесінде өткізілетін үшінші лицензиялық киноконцерт. Алдыңғы екі киноконцерт жартылай қайырымдылық мақсатта өтті, оларды 5 мыңнан астам адам көрді. Киноконцерттің бірегейлігі – ол Қазақстан үшін арнайы жасалған. Алғаш рет телеарнада біз «Диснейдің» ең жақсы мультфильмдерінің үзінділерін көре аламыз, оған 11 музыкалық Оскарды жеңіп алған 11 фильмнің 22 композициясы кірді», - деді «Болашақ» КҚ қамқоршылық кеңесінің төрайымы Динара Шәйжүнісова.

Айта кетерлігі, Disney киностудиясы түсірген анимациялық фильмдердің сүйікті музыкаларын және ең үздік сәттерін 27 желтоқсанда «Астана» телеарнасынан көруге болады.

«Қордың кезекті ірі жобасы – «Жұлдыздар шеруі» киноконцерті. Ол елімізде алғаш рет сахналанды. Және біздің «Астана» арнасы бұл концертті 27 желтоқсан күні сағат 15:00-де қазақстандық көрерменге ұсынады. «Астана» – отбасылық телеарна. Біздің әр көрерменнің асыға күтетін сүйікті тележобасы бар. «Жұлдыздар шеруі» әсіресе, бүлдіршіндер мен жастар аудиториясына және ата-аналарға да қызықты болады деп есептейміз. Өйткені, біз көрерменге тек сапалы контент ұсынуға мән береміз»,- деді «Астана» телеарнасының бас директоры Құрманбек Жұмағали.

DISNEY КИНОКОНЦЕРТІ ТУРАЛЫ ҚЫЗЫҚТЫ ДЕРЕКТЕР:

• Киноконцерт дегеніміз – «Дисней» фильмдерінің үзінділерін үлкен экранда эстрадалық-симфониялық оркестрмен және вокалды орындаумен бірге көру.
• Ресми киноконцерттер тек Disney компаниясының лицензиясы бойынша өтеді.
• «Диснейдің» ресми киноконцерттері Лондон, Сан-Франциско, Токио, Сидней, Париж, Мәскеу және т. б. үздік концерт залдарында өтеді.
• Киноконцертте «Дисней» студиясының түпнұсқа партитуралары қолданылады.
• Киноконцерттің саундтректері 11 «Оскар» сыйлығын жеңіп алды.
• Киноконцерттер аудиторияны, атап айтқанда, балаларды болашақта маңызды классикалық музыканы қабылдауға дайындайды.  
• Танымал композиторлар фильмдерге музыка жазды: Ханс Зиммер, Алан Менкен және Джерри Голдсмит.
• Әндердің көп бөлігі @bolashakcharity дубляждалған фильмдерінен алынған
• 2018 жылы Қазақстанда алғашқы Disney киноконцерті өтті.

Сымбат Ғалымжан, Нұр-Сұлтан