Көрме Еуропадағы концерттермен қатар өтіп жатыр
12–17 қараша аралығында Берлин қаласында қазақстандық әнші Димаш Құдайбергенге арналған «JULDYZ» көрмесі өтіп жатыр. Көрме Димаштың Еуропадағы жеке концерттеріне орай ұйымдастырылған, деп хабарлайды Azattyq Rýhy.
Экспозиция Erster Erster галереясында қойылған. Бұл орын 14 қарашада өтетін «Stranger» шоуы жоспарланған Max-Schmeling-Halle аренасына жақын орналасқан.
Көрмеде суретші Punktgeläut-тың маймен салынған картиналары мен қарындашпен салған жұмыстары қойылған.
Автор еңбектері Димаштың шығармашылық жолындағы ерекше сәттерді, сондай-ақ оның жақын адамдары – Раушан Құдайберген мен Расул Усмановтың портреттерін қамтиды.
Көрменің идеясы – Димаштың өнердегі әсерін, музыкадан тыс оның әлеуметтік бастамаларға қосқан үлесін көрсету.
«Димаш Құдайбергеннің даусы жанрлар мен шекараларды еңсерді. Бұл шағын коллекция оның өнердегі ғана емес, қоғамдағы орны мен ықпалын да бейнелейді. Ол – әлемге Қазақстанды танытып жүрген музыкант, бейбітшілік пен білімді қолдаушы, жас таланттарға қамқоршы», – дейді автор.
Көрмеге кіру тегін. Сатылған картиналардан түскен қаражаттың 50%-ы «Сәби» қайырымдылық қорына аударылады. Қор БҰҰ-ның Тұрақты даму мақсаттарына, соның ішінде Қазақстандағы білім беру мен экология мәселелеріне бағытталған жобаларды жүзеге асырады.