«Тәуелсіздік ұрпақтары» гранты: Жамбыл ауданының жастары үшін жаңа мүмкіндік пайда болды

Солтүстік Қазақстан облысы Жамбыл ауданында жастарға жаңа мүмкіндік сыйлайтын жобаға өтінімдер қабылданып жатыр, деп жазады Azattyq Rýhy.

Мәдениет және ақпарат министрлігі 2021 жылдан бері жастардың шығармашылық және әлеуметтік бастамаларын қолдау мақсатында «Тәуелсіздік ұрпақтары» грантын ұсынып келеді. Бұл жоба мемлекет тарапынан жастарға берілетін ең ірі қолдау құралдарының бірі саналады.

Өтінім қабылдау және техникалық мәселе

2025 жылдың 16 маусымы мен 18 тамызы аралығында грантқа қатысуға 1 391 өтінім түсті. Оның ішінде:

• «Ғылым» – 130,
• «Мәдениет» – 131,
• «Ақпараттық технологиялар» – 218,
• «Бизнес» – 644,
• «Медиа» – 145,
• «Волонтерлік» – 123 жоба ұсынылған.

Тексеру барысында 186 өтінім ресми түрде қабылданып үлгерді. Алайда 5 қыркүйек күні таңғы сағат 5:00-де Gmail платформасындағы техникалық ақауларға байланысты өтінім қабылдауға арналған электронды пошта бұғатталды. Оны қалпына келтіру үшін IT мамандар Google әкімшілігімен жұмыс істеді, алаяда, әрекеттер сәтсіз аяқталды.

Қайта қабылдау тәртібі

Осыған байланысты ұйымдастырушылар 2025 жылдың 9–19 қыркүйек аралығында жаңа өтінімдерді T.ZAIAVKA2025@BK.RU поштасы арқылы қабылдайтынын хабарлады. Құжаттар түнгі сағат 24:00-ге дейін жіберілуі тиіс. Бұған дейін қабылданған 186 өтінім иелеріне қайта жіберудің қажеті жоқ.

Грант көлемі мен қатысу шарттары

Биыл республикалық деңгейде 30 жоба таңдалып, әрқайсысы 3 миллион теңгеден қаржылай қолдауға ие болады. Грантқа 14 жастан бастап 35 жасқа дейінгі (34 жасты қоса алғанда) Қазақстан азаматтары қатыса алады.

Жобалар алты бағыт бойынша қабылданады:

• Ғылым – жаңа ғылыми зерттеулер мен жобалар;
• Мәдениет – ұлттық мұраны, дәстүрді және өнерді дәріптеу;
• Ақпараттық технологиялар – IT шешімдер мен стартаптар;
• Бизнес – жаңа бизнес-идеялар;
• Медиа – жастарға арналған танымдық әрі пайдалы контент;
• Волонтерлік – әлеуметтік мәселелерді шешуге бағытталған бастамалар.

Қажетті құжаттар тізімі

Өтінім беру үшін үміткерлер келесі құжаттарды дайындауы тиіс:

• Конкурстық өтінім (PDF);
• Жобаның сипаттамасы (Word);
• Бейнематериал (60 секундқа дейін) немесе презентация (10 слайдқа дейін);
• Шығындар сметасы (Word);
• Зияткерлік меншік туралы мәліметтер (бар болса, PDF);
• Жеке куәлік немесе туу туралы куәлік көшірмесі (PDF).

 «Тәуелсіздік ұрпақтары» гранты – елдің шығармашыл әрі белсенді жастарына үлкен мүмкіндік. Бұл бастама жастардың жаңа идеяларын жүзеге асырып, қоғамның дамуына үлес қосуына жол ашады.