Трамп Қырғызстан азаматтарының АҚШ-қа келуіне тыйым салуы мүмкін

Дональд Трамп әкімшілігі АҚШ-қа кіру ережелерін қатайтып, кейбір мемлекеттердің азаматтарына виза беру мәселесіне шектеу қоюы мүмкін. Бұл бастама, ең алдымен, көші-қон қауіпсіздігі мен визалық тәртіпті күшейту мақсатында қолға алынып отыр, деп хабарлайды Azattyq Rýhy.

Тізімде 36 ел бар, оның ішінде Қырғызстан да бар

The Washington Post басылымының мәліметінше, АҚШ Мемлекеттік департаменті шектеу енгізуі мүмкін 36 елдің тізімін дайындаған. Оның ішінде 25 ел – Африка құрлығынан, тізімде Қырғызстан да бар. Сонымен қатар Таяу Шығыс пен Азия елдері де қамтылған.

Мемлекеттік департамент елдерге 60 күндік мерзім берді

Сенбі күні АҚШ-тың мемлекеттік хатшысы Марко Рубио дипломатиялық өкілдіктерге арналған арнайы меморандумға қол қойды. Құжатта көрсетілгендей, аталған елдердің билігі 60 күн ішінде Мемлекеттік департамент белгілеген жаңа талаптар мен көрсеткіштерді орындауы тиіс.

Шектеу себептері: визаны асыра пайдалану, жемқорлық

Меморандумда шектеу енгізуге негіз болатын бірнеше себеп келтірілген:

• Елдерде сенімді және ынтымақтасуға дайын билік органдарының болмауы;
• Лауазымды тұлғалардың тарапынан кең тараған жемқорлық;
• Көптеген азаматтардың АҚШ визасының мерзімін заңсыз ұзартуы;
• Кейбір елдерде инвестиция арқылы азаматтықты сату жүйесі бар, бұл ретте елде тұру талабы қойылмайды;
• Азаматтар арасында антисемиттік және антиамерикалық көзқарастардың таралуы.

Қауіп төнген елдердің толық тізімі

Меморандумда аталған елдер мыналар:

Ангола, Антигуа мен Барбуда, Бенин, Бутан, Буркина-Фасо, Кабо-Верде, Камбоджа, Камерун, Кот-д’Ивуар, Конго Демократиялық Республикасы, Джибути, Доминика, Эфиопия, Египет, Габон, Гамбия, Гана, Қырғызстан, Либерия, Малави, Мавритания, Нигер, Нигерия, Сент-Китс пен Невис, Сент-Люсия, Сан-Томе мен Принсипи, Сенегал, Оңтүстік Судан, Сирия, Танзания, Тонга, Тувалу, Уганда, Вануату, Замбия, Зимбабве.