Александр Бублик спорттық карьерасын аяқтаған соң Санкт-Петербургқа кеткісі келеді
Ол – үлкен теннистен Қазақстанның бірінші, әлемнің 33-ші ракеткасы
Александр Бублик спорттық мансабын аяқтаған соң Ресейге кеткісі келетінін, нақтырақ Санкт-Петербургта тұруды қалайтынын айтты, деп хабарлайды Azattyq Rýhy.
Бублик 2016 жылдан бері Қазақстан туының астында өнер көрсетеді. Спортшы қазіргі таңда Монакода тұрады. Бірақ болашақта туған жеріне оралғысы келеді.
«Мен Қазақстанның намысын қорғап жүргеніммен ұлтым – орыс. Астана маған көп көмектесті, бірақ мені Санкт-Петербургқа тартады да тұрады. Өз адамдарымызды жақсы көремін. Мен бұл қаласыз өмір сүре алмайтын шығармын», – деп мәлімдеді Бублик.
Дегенмен спортшы Қазақстан азаматтығын алғаны үшін ешқашан өкінбейтінін айтты.
«Бұл шешім маған көмек керек болған кезде қабылданды. Қазақстан маған көмектесті, мен федерацияға, президентіне және елге қарыздармын. Қазақстан маған мүмкіндік берді. Сондықтан мен еш өкінбеймін. Ондай ой жоқ. Дей тұрғанмен мен ұлтымды ауыстыра алмаймын. Бірақ Қазақстанның атынан жарыстарға қатысуды жалғастыра беремін – бұл талқылауға жатпайды», – деді теннисші.
