Жергілікті идеологтар бейнероликтердің мазмұнына мұқият қарауы керек - Аида Балаева
Ол әкімдіктер жанынан арнайы жұмыс топтары құрылуы керек деп жазды
Жергілікті идеологтар мемлекетіміздің басты басымдықтарын ұмытпай, бейнероликтердің мазмұнына мұқият қарауы керек. Бұл туралы Ақпарат және қоғамдық даму министрі Аида Балаева Facebook-парақшасында жазды, деп хабарлайды Azattyq Rýhy тілшісі.
«Қазақстан - зайырлы мемлекет, сондықтан Конституция барлық азаматтарға бірдей құқық, олардың ар-намысы мен қадір-қасиетін құрметтеуге кепілдік береді. Оның ішінде біз әлеуметтік желілердегі біреудің ар-намысына тиетін түрлі жазбалар туралы айтып отырмыз. Бұл, мемлекеттік әлеуметтік тапсырыс аясында жасалған бейнебаянға да қатысты. Жергілікті идеологтар мемлекетіміздің басты басымдықтарын ұмытпай, бейнероликтердің мазмұнына мұқият қарау керек деп санаймын», - деді министр.
Ол әкімдіктер жанынан арнайы жұмыс топтары құрылып, мемлекеттік тапсырыспен жасалатын өнімдерді бұқаралық ақпарат құралдарында және әлеуметтік желілерде жарияланбас бұрын егжей-тегжейлі талдап, іріктеп алғаны дұрыс екенін жазды.
