ҚТЖ жолаушылар пойызының уақытша тоқтағанынан 3,8 млрд теңге шығынға батқан

«Қазақстан темір жолы» АҚ пандемия салдарынан жолаушылар пойызын уақытша тоқтатқан кезде 3,8 млрд теңге шығынға батқан. Индустрия және инфрақұрылымдық даму министрлігінің хабарлауына, аталған сома – тек бір айдағы көрсеткіш.

«Қазіргі уақытта жолаушылар пойызы рейстерінің уақытша тоқтатылуына байланысты бір айдағы шығын көлемі шамамен 3,8 млрд теңге. 1 маусымнан бастап жолаушылар пойызы қайта қатынауды бастады, сондықтан компаниялардың кеткен шығынды қалпына келтіру үшін біраз уақыт қажет», - деп хабарлайды ИИДМ.

Қауіпті эпидемияға байланысты Қазақстанда жолаушылар пойызы 31 наурыздан бастап 1 маусымға дейін уақытша тоқтатылған еді. Ведомствоның хабарлауынша, 2020 жылдың қаңтар-сәуір айлары аралығында пойызбен 5 млн жолаушы қатынаған, бұл көрсеткіш бұрынғыдан 27,5%-ға аз.

Сондай-ақ жауапты министрлік кеткен шығынға қарамастан пойыз билеттері қымбаттамайтынын айтқан.