Әділетті Қазақстан құру ісінде мұғалімдердің рөлі айрықша – ұстаз

Қонаев қаласының №3 орта мектебінде қазақ тілі мен қазақ әдебиеті пәнінен сабақ беретін Гүлпаршын Қалмұрзаева мемлекет басшысының 2 қыркүйектегі жолдауы туралы пікір білдірді, деп хабарлайды Azattyq Rýhy.

Гүлпаршын Қалмұрзаева ұстаз болғандықтан, жолдаудың білім мен ғылымға арналған бағытына ерекше тоқталды. 

«Мемлекет басшысы кәсібіне адал әрі жауапкершілікпен қараған адам қашанда лайықты бағасын алатынына, еңбегінің мемлекеттік деңгейде бағалануы барша кәсіп иесіне ерекше шабыт беріп, еңбек адамның абырой-беделін көтеретініне тоқталып, "Адал азамат – Адал еңбек – Адал табыс" қағидатын ұсынғанын айтты. Атқарылып жатқан ауқымды жұмыстардың "Халық үніне құлақ асатын мемлекет" қағидасын орнықтыруда маңызы зор екенін айта келе, 2025 жылды «Жұмысшы мамандықтары жылы» деп жариялады. Жұмысшы мамандықтары қай кезде де қажет болған және оған әрдайым құрмет көрсетілген», - дейді қазақ тілі пәнінің мұғалімі. 

Сондай-ақ ол президенттің мұғалімдердің біліктілігін арттыруға және әлеуметтік мәртебесін көтеруге ерекше көңіл бөлгеніне назар аударды. 

«Мемлекет басшысының: «Әр адамға және баршаға бірдей мүмкіндік беретін мемлекетті, яғни Әділетті Қазақстанды болашақ ұрпаққа аманат ету – баршамызға ортақ міндет» деген қорытынды сөзі ұстаздарға да өте үлкен сенім артатынын және соған лайықты біліктілікті талап ететінін түсінеміз. Әділетті Қазақстан құру ісінде мұғалімдердің рөлі айрықша екені рас», - дейді Қалмұрзаева. 

Айта кетейік, мемлекет басшысы Қасым-Жомарт Тоқаев 2 қыркүйекте жыл сайынғы жолдауын жариялады.