Түркістан облысында мектеп мұғалімі сот арқылы бұрынғы жұмыс орнына қайта орналасты

Келес ауданында орналасқан жалпы орта білім беру мектебінің бірінде бұрынғы мұғалімі жұмыстан босату жөніндегі бұйрығымен келіспей, жұмыс берушінің жұмыстан босату туралы бұйрықтың күшін жойып, жұмысына қайта орналастыру және амалсыз бос жүрген күндеріне жалақы өндіру туралы талап қоюмен аудандық сотқа жүгінген, деп хабарлайды Azattyq Rýhy.

Сот отырысында анықталғандай арызданушы мен мектеп директорының арасында 2019 жылы сәуір айында еңбек шарты түзілген.

Алайда 2023 жылы қазан айындағы Келес аудандық полиция бөлімінің анықтаушысының қаулысымен талап қоюшы Д. 2012 жылы берілген дипломы жалған екенін біле тұра оны мектепке ұсынып, пайдаланған фактісі бойынша қылмыстық іс қозғалып, мерзімінің ескіруіне байланысты тоқтатылған.

«Осы жағдайға байланысты, 2023 жылғы қыркүйек айындағы Келес аудандық полиция бөлімінің ұсынысына сай, талап қоюшы Д.-мен түзілген еңбек шарты мектеп директорының бұйрығымен тоқтатылып, жұмыстан босатылған. Сот іс-құжаттарын зерделеп, жұмыс беруші мемлекеттік білім беру ұйымдарының педагогін босатуы заңсыз орындалды деген тұжырымға келді», - делінген хабарламада.

Сот шешімімен мектеп директорының бұйрығы заңсыз деп танылып, күші жойылды. Талап қоюшы Д. бұрынғы қызметіне қайта орналастырылды, ал амалсыз бос жүрген күндеріне жалақы өндіру туралы талабы қанағаттандырусыз қалдырылды.

Шешім заңды күшіне енген жоқ.