Павлодар тұрғыны шетел азаматына заңсыз донер дайындатқан

Павлодар облысының полицейлері заңсыз жұмыс істеген шетелдіктерді анықтады, деп хабарлайды Azattyq Rýhy.

Полиция донер жасау орындарын тексеру барысында тиісті құжаттарсыз шетел азаматын жұмысқа тарту фактісін анықтады.

«Халықтың көші-қоны саласындағы заңнамасын бұзғаны үшін шетелдікке және жұмыс берушіге қатысты әкімшілік материалдар жиналып, 25 және 100 АЕК мөлшерінде айыппұл салынды», – деді Павлодар облысы ПД көші-қон қызметінің бастығы Дәулет Ысқақов.

Сондай-ақ Шідерті кентінің жанындағы «Бекет» стационарлық бекетінде полиция тағы бір шетел азаматының еліміздің көші-қон заңнамасын бұзғанын және еңбек қызметін жүзеге асыру фактісін анықтады.

«Шетелдік азамат жеке кәсіпкердің жүк көлігінде жүргізуші болып жұмыс істеген. Құқық бұзушыға қатысты әкімшілік материалдар жасалып, шешім қабылдау үшін сотқа берілді. Май ауданында қонақ визасымен келген көршілес елдің үш азаматы шығу күнін кешіктіріп, еңбек қызметін тиісті құжатсыз жүзеге асырған. Шетелдіктерге қатысты құқық бұзушылық бойынша әкімшілік материал жиналып, 25 АЕК мөлшерінде айыппұл салынды. Жұмыс беруші де жазаланып, оған 30 АЕК мөлшерінде айыппұл салынды», - делінген ақпаратта.

Екі күнінің қорытындысы бойынша полицейлер 91 шетел азаматын және Қазақстан Республикасының 43 азаматын анықтап, әкімшілік жауапкершілікке тартты. 52 әкімшілік материал сотқа жіберілді. Нәтижесінде 13 азаматқа қатысты оларды елден шығару туралы шешім қабылданды. Полицейлер шетелдік жұмыс күшін заңсыз пайдаланудың 13 фактісін анықтады.

Естеріңізге сала кетейік, «Заңсыз келуші-2024» республикалық жедел-профилактикалық іс-шарасы 9 маусымға дейін жалғасады.