ШҚО-да 5 адам 19 млн теңгеден асатын пәтерлерді заңсыз жекешелендірген
Мемлекет меншігіне қайтарылған пәтерлер заңда белгіленген тәртіппен мұқтаж жандарға берілетін болады
Шығыс Қазақстан облысының Алтай ауданында 5 мемлекеттік пәтердің заңсыз жекешелендірілгені анықталды. Бұл туралы ШҚО прокуратурасының баспасөз қызметінен мәлім етті, деп хабарлайды Azattyq Rýhy.
Прокуратураның мәліметінше, Алтай ауданының тұрғын үй-коммуналдық шаруашылық, жолаушылар көлігі, автомобиль жолдары және тұрғын үй инспекциясы бөліміндегі тұрғын үй заңнамасының сақталуына тексеру жүргізілді.
Соның нәтижесінде, атында өз үйі бар және мемлекеттік тұрғын үй алу үшін заңда көзделген мерзімдері келмеген тұлғалардың мемлекеттік тұрғын үй қорынан пәтерлерді заңсыз жекешелендіру фактілері анықталды.
«5 адам 19 млн теңгеден асатын пәтерлерді заңсыз жекешелендірген. Прокурорлық қадағалау актісі бойынша барлық тұрғын үй мемлекет меншігіне қайтарылды. ТКШ бөлімінің басшысы тәртіптік жауапкершілікке тартылды. Мемлекет меншігіне қайтарылған пәтерлер заңда белгіленген тәртіппен мұқтаж жандарға берілетін болады», - делінген ақпаратта.
