Елордада сауда орталығынан қымбат әтірлерді қолды қылған азаматтың ісі бейнекамераға түсіп қалды

Елордада сауда орталығынан қымбат әтірлерді ұрлаған ер азаматтың ісі әшкере болды. Оның қылмыстық әрекеті бейнекамераға түсіп қалған, деп хабарлайды Azattyq Ruhy Polisia.kz-ке сілтеме жасап.

Есіл ауданы ПБ криминалдық полиция қызметкерлері жедел-іздестіру іс-шараларын жүргізу кезінде парфюмді ұрлауға қатысы бар 37 жастағы ер адамды анықтады. Тергеу барысында ер адам күндізгі уақытта сауда орталығына келіп, сатып алушы ретінде тауарларды қарай бастағаны анықталды. Әтір сатып алатындай кейіп танытып, ол жаңажылдық мерекелердегі қарбаласты пайдаланып, өзін ешкім бақыламай тұрғанына көз жеткізген соң сөредегі парфюмді алып, күртесінің қалтасына салып алған. Осылайша ол үш әтірді қолды қылған.

«Аталған фактіге қатысты ҚР ҚК-нің 188-бабы (Ұрлық) бойынша сотқа дейінгі тергеу амалдары жүргізіліп жатыр. Ер адам мойындау көрсетпелерін берді, заттай дәлелдемелер тәркіленді, оның елорда аумағында бұрын жасалған осыған ұқсас қылмыстарға қатысы бар-жоғын тексеру жүргізілуде», - делінген хабарламада.