Әшімбаев: Астананың мерейтойы – тұтас ұлтымыздың мерейі

Қазақстан Республикасы Парламенті Сенатының төрағасы Мәулен Әшімбаев Астананың 25 жылдық мерейтойына орай Facebook және Instagram әлеуметтік желілерінде жазба қалдырды, деп хабарлайды Azattyq Ruhy.

«Баршаңызды Астананың 25 жылдық мерейтойымен шын жүректен құттықтаймын! Елордамыз осы жылдардың ішінде қарқынды дамып, өзінің мәртебесіне сай еңселі орталыққа айналды. Ұлтымызды ұйыстырып, бірлігімізді бекемдеуге зор ықпалын тигізді» деді Әшімбаев.

Астананың Арқа төріне көшуі еліміз үшін өте қиын кезеңдерде іске асқаны белгілі. Сондай-ақ Президент Қасым-Жомарт Кемелұлы Тоқаев кеше ғана өткен Астананың 25 жылдық мерейтойына арналған бауырлас қалалар форумында бұл – халқымыздың болашақ тағдырын айқындаған аса маңызды және дер кезінде қабылданған тарихи шешім болғанын айрықша атап өтті деп қосты Сенат спикері.

«Шын мәнінде, жаңа астана өзі ғана өркендеп қоймай, тұтас елдің ілгері жылжуына тың серпін берді. Астанамыз ширек ғасырдың ішінде жан-жақты дамыды. Осылайша ол әкімшілік орталық қана емес, мәдени-рухани салмағы басым іргелі шаһарға айналды.Сондықтан Астананың мерейтойы – тұтас ұлтымыздың мерейі деп сенімді түрде айта аламыз. Баршаңызды осы мерекемен құттықтай отырып, елімізге амандық, жерімізге тыныштық және әр отбасына ырыс пен ынтымақ тілеймін!» делінген Мәулен Әшімбаевтің құттықтауында.