Ауыл халқының 84 пайызы өз әкімдеріне сенеді – Тоқаев

Бүгін Астанада өтіп жатқан ауыл әкімдерінің диалог-платформасында сөз сөйлеген президент Қасым-Жомарт Тоқаев ауыл халқы өз әкімдеріне қаншалықты сенетінін айтты, деп хабарлайды Azattyq Rýhy.

Қасым-Жомарт Тоқаевтың айтуынша, саяси ұйымдардың 1500-ден астам өкілі әкім болып сайланған.

«Олар өз үміткерлерін ұсынып, сайлауға белсене араласты. Саяси ұйымдардың 1500-ден астам өкілі әкім болып сайланды. Жаңа басшылардың қатарында алты партияның мүшелері бар. Ал 700-ден астам азамат өзін-өзі ұсынып, сайлауда жеңіске жетті», - деді Тоқаев.

Президенттің айтуынша, сайланған әкімдер жұмысқа кірісіп кетті, жақсы көрсеткіш көрсеткен. Ең бастысы, олар жергілікті жұрттың мұң-мұқтажын, шешімін таппай жатқан түйткілдерді жақсы біледі.

«Ауыл-аймақтың дамуына бөлінген бюджет қаражаты да тиімді игеріле бастады. Ауылдардың кірісі көбейді, мемлекет тарапынан берілетін қаржыға, яғни дотацияға тәуелділік азайып келеді. Жақында жүргізілген сауалнамаға сәйкес ауыл тұрғындарының 84 пайызы өз әкімдеріне сенетіні анықталды. Бұл – өте жақсы көрсеткіш. Сондықтан ауыл әкімдерін сайлау үдерісі алдағы уақытта да жалғасын табады», - дейді Тоқаев.