Аудиториядан – индустрияға: Ақтөбелік студенттердің жобасы мұнай өндірісіне енеді

Жұбанов атындағы Ақтөбе өңірлік университетінің студенттері әзірлеген жоба жергілікті жер қойнауын пайдаланушылардың өндірістік процесіне енгізілуде. Жас мамандардың жұмысы мұнай-газ саласында сұранысқа ие болды, деп хабарлайды Azattyq Rýhy университеттің баспасөз қызметіне сілтеме жасай отырып.

АРУ-дың мәліметінше, студенттер Рамзан Абдуллин мен Роман Соколов өндірістік нысандарды бақылау жүйесін жасап шыққан. Бұл жүйе нақты уақыт режимінде қысымды, температураны және ұңғымалардың дебитін бақылауға, ақауларды анықтауға және апаттардың алдын алуға мүмкіндік береді. Басшылық үшін интерактивті карта мен талдау, ал операторлар үшін шалғайдағы кен орындарында жұмыс істеуге ыңғайлы оффлайн-режим қарастырылған.

«КМК Мұнай» АҚ инновацияға қызығушылық танытып, жобаны сатып алды және студенттердің авторлық құқығын сақтап қалды. Компания өкілдерінің айтуынша, жүйе жұмыстың тиімділігін арттырып, апаттық жағдайлардың алдын алуға септігін тигізеді.

Жұбанов университетінде бұл жобаның сәтті коммерциялануы жас мамандар үшін маңызды қадам болғанын атап өтті. Бұл студенттік бастамалардың нақты экономика секторында қолданылып, отандық технологиялардың дамуына үлес қоса алатынын көрсететін мысал.