Танымал спортшы допинг дауына ұшырап, төрт жылға спорттан шеттетілді

Жеңіл атлетикадағы беделді украиналық спортшы, ұзындыққа секіруден жүлдегер Марина Бех-Романчук төрт жылға дисквалификация алды. Бұл туралы Athletics Integrity Unit (AIU) хабарлады, деп жазады Azattyq Rýhy.

Допинг дауы

2024 жылғы 7 желтоқсанда Хмельницкий қаласында спортшыдан алынған допинг сынамасында тестостерон деңгейінің жоғарылығы анықталған. Мамырда оған уақытша шектеу қойылып, алғашқы ресми турнирге қатыса алмады. Маусымда «B сынамасы» да оң нәтиже көрсетті.

Тергеу барысында Бех-Романчук кінәсін мойындаған жоқ, бірақ оны дәлелдей алмады. Осыған байланысты AIU 2025 жылдың 13 мамырынан бастап оны төрт жылға жарыстардан шеттету туралы шешім қабылдады.

Спортшының жауабы

30 жастағы атлет Instagram-парақшасында мәлімдеме жасап, айыптаулармен келіспейтінін айтты. Ол өз карьерасында күмән тудыратын нәтижелер болмағанын атап өтті.

«Бұл жағдай менің денсаулығыма және эмоционалды жағдайыма қатты әсер етті. Сондықтан мен уақытша үзіліс алып, отбасым мен өз денсаулығыма көңіл бөлуді жөн көрдім», – деді спортшы.

Бех-Романчуктың жетістіктері қатарында әлем чемпионаттарының екі күміс медалі бар. Ол соңғы үш Олимпиадаға қатысып, ең үздік нәтижесін Токио-2020-да көрсеткен – ұзындыққа секіруден бесінші орын.