Салтанат Байқошқарованың сіңлісі Елдос Колобок пен әйелінен, қазақ елінен кешірім сұрады (ВИДЕО)

«Экомед» клиникалар желісінің жетекшісі Салтанат Байқошқарованың сіңлісі Перизат Байқошқарова блогер, әзілкеш Елдос Кәдірханов пен оның жұбайы Таңшолпаннан, қазақ елінен әлеуметтік желі арқылы кешірім сұрады, деп хабарлайды  Azattyq Rýhy.

Бір ауыз сөз жүрекке ауыр тиді

«Айналайын Елдос, Таңшолпан! Сіздердің қол жеткізген нәтижелеріңізге бүкіл ел қуанып жатыр. Астана қаласындағы клиникамызға, сондай-ақ Алмаз Құрманәлиұлы мен Азамат Сандыбайұлына үлкен алғыс айтып жатқандарыңызға шын жүректен ризамыз. Басқа елдерде ота жасалып, нәтиже болмай жатса да, Астанадағы орталықта сәтті ота жасалып, ұрық табылып, эмбрион дайындалып, жүктілікке қол жеткіздік. Одан бөлек, қалған биоматериал да арнайы сақтаулы тұр», - деп жазды Перизат Байқошқарова.

Ол осындай керемет нәтижелерге себепкер болған ең озық технологиялар барша халыққа қолжетімді болу үшін Астана, Алматы, Шымкент, Ақтөбе және Атырау қалаларындағы орталықтарға орнатылғанын атап өтті.

«Мен тек осыны жеткізгім келген еді. Алайда айтылған бір ауыз сөзім кейбір жүректерге ауыр тигенін естіп, жүрегім алаң. Бұл сөз ешкімді ренжіту үшін емес, керісінше, үміт сыйлау үшін айтылған еді… Иә, Елдос бауырым бұрынырақ хабарласқан. Ол кезде, өкінішке қарай, бізде ондай технология болмаған. Ал бүгінгі таңда бар», - деп түсіндірді дәрігер.

«Елдос дұрыс айтты: «Бәрі дәрігер емес». Ал мен де журналист емеспін. Сондықтан кей сөздерім бұрмаланып, толық жеткізілмеген болуы мүмкін. Соған шын жүректен кешірім сұраймын. Елдос пен Таңшолпаннан, сондай-ақ барша Қазақ елінен кешірім сұрай отырып, осы видеомен арада туындаған түсініспеушілікке нүкте қоюды жөн көрдім», - деп түйіндеді Перизат Берденқызы.

Блогер неге ренжіді

Еске сала кетейік, Елдос Кәдірханов өзінің бедеулікке қатысты жеке ақпаратын жария еткен дәрігердің сөзіне реніш білдірген еді. Ол бұл жағдайдан кейін отбасында психологиялық күйзеліс болып жатқанын айтты.

«Перизат ханым, сіз бізді емдеген жоқсыз, біздің операцияда болған жоқсыз. Бірақ кабинетте, дәрігерлер отырған жерде айтатын әңгімені әлеуметтік желіде айта салдыңыз. Сол сіздің үлкен қателігіңіз болды. Себебі халықтың бәрі дәрігер емес»– деді Елдос.

Ол өз сөзінде жұбайының бұл жағдайдан кейін қатты уайымға түскенін айтып, оны жұбата алмай жүргенін жеткізді.