Алматыда көпқабатты үйлердің подъезінен велосипед ұрлап жүрген ер адам ұсталды

Алматы қаласында велосипед ұрлады деген күдікпен 1981 жылы туған ер адам ұсталды. Ол көпқабатты тұрғын үйлердің подъездеріне еш қиындықсыз кіріп, иесіз қалған велосипедтерді ұрлап жүрген. Бұл туралы Алмалы аудандық полиция басқармасы мәлімдеді, деп хабарлайды Azattyq Rýhy.

Ұрлықтың стандартты тәсілі: ашық есік – оңай олжа

Тергеу деректеріне сәйкес, күдікті ашық қалған кіреберістерді іздеп, еш кедергісіз кіріп, жалпы дәліздер мен баспалдақ алаңдарында қалдырылған мүлікті алып кеткен.

«Құрметті қала тұрғындары! Велосипедтерді, самокаттарды және өзге де құнды заттарды кіреберістерде, холлдар мен баспалдақ алаңдарында қалдырмауларыңызды сұраймыз. Бұл жерлер қауіпсіз болып көрінгенімен, мүлік қауіпсіздігін қамтамасыз ету үшін құлыптар қолданыңыздар және техниканы жабық бөлмелерде сақтаңыздар», – деді Алмалы аудандық полиция басқармасының бастығы Мақсат Пшан.

Күдікті уақытша ұстау изоляторына қамалды

Қазіргі таңда күдіктінің Алмалы ауданында жасалған кемінде төрт ұрлық фактісіне қатысы бар екені анықталды. Аталған деректер бойынша қылмыстық іс қозғалды.

Күдікті уақытша ұстау изоляторына қамалды, оның басқа да ұқсас оқиғаларға қатысы бар-жоғы тексерілуде.