Павлодарда есірткі жасырмақ болған ерлі-зайыпты қолға түсті (ВИДЕО)

Павлодардағы сауда үйлерінің бірінің жанына бірнәрсе жасырып жатқан жас жұбайлардың әрекеті видеоға түсіп қалды, деп хабарлайды Azattyq Rýhy.

Оқиға орнына дереу полиция қызметкерлері жіберілді. Тәртіп сақшыларын көргенде ер адам қашып кетуге тырысқанмен, ұсталып қалды. Келген полицейлер жас жұбайлардан жеке-жеке лентаға оралған 10 байламды тауып алып, тәркіледі. Кейінірек сараптама көрсеткендей, салмағы 44 гр-ден асатын есірткі-гашиш тәркіленді.

Есірткі заттарын заңсыз сатып алу, сақтау немесе өткізу фактісі бойынша қылмыстық іс қозғалды.

«Бұл жағдай қылмысқа қарсы күресте заманауи технологияларды қолданудың маңыздылығын және құқық қорғау органдарының үйлестірілген іс-қимылдарының жоғары тиімділігін көрсетеді. Ұстау полиция қызметкерлерінің жедел жұмысы мен бейнебақылауды пайдаланудың арқасында мүмкін болды, бұл күдіктілердің жеке басын тез және дәл анықтауға мүмкіндік берді», – деп атап өтті Павлодар облысының Полиция департаменті.