Ақтауда құлаған ұшақта 105 адам болуы мүмкін

Ақтау қаласының маңында апатқа ұшыраған ұшақта қанша адам болғаны туралы алдын ала ақпарат жарияланды, деп хабарлайды Azattyq Rýhy.

Ресейлік Baza телеграм-каналы ұшақтың бортында 67 жолаушы мен 5 экипаж мүшесі болғанын айтады. Ал өзге де дереккөздер бортта 105 адамға дейін болуы мүмкін екенін жазып жатыр. Әзербайжан авиакомпаниясы бұл ақпаратты әзірге ресми растаған жоқ.

Мәліметтерге сәйкес, ұшақ Баку-Грозный рейсін орындаған.

Оқиғаға қатысты ҚР ТЖМ мәлімет таратты.

«Ақтауда ұшақ құлаған орынға Қазақстан ТЖМ жеке құрамынан 52 адам және  11 бірлік техникасы барды. Оқиға орнына келген бойда  әуе кемесі жанып жатты. Құтқару бөлімшелері өртті сөндіруге кірісті. Қазіргі уақытта зардап шеккендер туралы ақпарат нақтылануда, алдын ала мәлімет бойынша тірі қалған адамдар бар», - деп жазды ҚР ТЖМ.