Францияның бұрынғы президенті Николя Саркози үш жылға бас бостандығынан айырылды

Францияның бұрынғы президенті өзіне қатысты сот ісіне ықпал ету мақсатында Кассациялық соттың жоғары лауазымды судьясымен сыбайлас жемқорлық келісімін жасағаны үшін кінәлі деп танылды, деп хабарлайды Azattyq Rýhy Euronews-ке сілтеме жасап.

Париждегі Кассациялық сот Францияның бұрынғы президенті, 69 жастағы Николя Саркозиге қатысты Апелляциялық соттың шешімін күшінде қалдырды: сыбайлас жемқорлық, ықпал саудасы және тергеуге қысым көрсету ісі бойынша үш жылдық жаза, оның ішінде бір жылы электронды білезік тағу арқылы нақты бас бостандығынан айыру.

Мемлекет басшысы болған Саркози 2014 жылы өз адвокаты Тьерри Эрцогпен бірге Кассациялық соттың жоғары судьясы Жильбер Азибермен «сыбайлас жемқорлық келісімін» жасағаны үшін кінәлі деп танылды. Келісімнің мақсаты – Саркозиге қатысты «Бетанкур ісі» бойынша ақпарат алу және сот шешіміне ықпал ету.

Сот Саркозидің Азиберге Монакодан қызметке орналасуға жәрдемдескенін және бұған жауап ретінде ақпарат алғанын дәлелденген деп тапты. Саркози мен Азибер арасындағы делдал рөлін Эрцог атқарған.

Барлығы үш жылға бас бостандығынан айырылып, бұрынғы қызметтерін атқаруға үш жылға тыйым салынды. Саркозиге үш жыл бойы сайлауға қатысуға да тыйым салынды.

Францияның ең жоғарғы сот инстанциясы – Кассациялық сот бұл ұзақ сот процесінде ешқандай құқықтық бұзушылықтар болмағанын растады. Енді Саркози жазаны орындау тәртібін белгілейтін судьяға шақырылады және оған электронды білезік тағылатын болады.

Саркозидің адвокаты саясаткердің Кассациялық сот шешіміне бағынатынын, бірақ өз кінәсіздігін дәлелдеу үшін Адам құқықтары жөніндегі Еуропалық сотқа жүгінетінін мәлімдеді.

Саркозиге қатысты сот ісі 2020 жылдың қарашасында басталды. Оған президент лауазымында болған кезінде L'Oreal косметика компаниясының тең иесі, миллиардер Лилиан Бетанкурдың қайырымдылық қаражатын 2007 жылғы сайлауалды науқанын қаржыландыру үшін пайдалану ісіне тергеуге ықпал етуге тырысты деген айып тағылды.

2013 жылы Саркози бұл айыптан ақталғанымен, адвокатымен жүргізілген телефон сөйлесулерін тыңдау барысында тергеу жаңа дәлелдер тапты.

2021 жылы Саркози үш жылға бас бостандығынан айыру жазасына кесілген еді, оның екі жылы шартты түрде. Бір жылын ол электронды білезік тағып, үйқамақта өткізуге тиіс болды.

2023 жылдың 17 мамырында Париждің Апелляциялық соты бұл үкімді күшінде қалдырды.

2021 жылдың қыркүйегінде Саркози «Bygmalion ісі» деп аталатын 2012 жылғы сайлауалды науқанын заңсыз қаржыландыру (22,5 млн еуро көлеміндегі заңды шығын лимитінен асып кету) бойынша тағы бір жыл бас бостандығынан шектеу жазасына кесілді.

Николя Саркози 2007 жылдан 2012 жылға дейін Франция президенті қызметін атқарды. Ол ел тарихында нақты мерзімге бас бостандығынан айырылған алғашқы мемлекет басшысы, ал сотталған екінші президент атанды. Бұған дейін, 2011 жылы, Францияның экс-президенті Жак Ширак 1990-1995 жылдары Париж мэрі болып тұрған кезінде мэрияда жалған жұмыс орындарын құру ісі бойынша екі жыл шартты мерзімге сотталған еді.

6 қаңтарда Николя Саркозиге қатысты жаңа сот процесі басталады. Онда оның 2007 жылғы президенттік сайлау науқанын Ливияның қаржыландыруына байланысты күдіктер қаралатын болады.