Қазақстандық балуан Ержет Жарлықасын әлемдік рейтингте көш бастады

Қазақстандық грек-рим күресінің шебері Ержет Жарлықасын 63 келіге дейінгі салмақ дәрежесінде Біріккен күрес әлемі (UWW) рейтингінің көшбасшысы атанды, деп хабарлайды Azattyq Rýhy Sports.kz-ке сілтеме жасап.

Жарлықасын бұл жетістікке Албанияның Тирана қаласында өткен бейресми салмақ дәрежелері бойынша әлем чемпионатында күміс медаль жеңіп алғаннан кейін қол жеткізді. Финалда Ержет әзербайжандық Нихат Мамедлиден жеңіліп қалды. Дегенмен, жаңартылған рейтингте Жарлықасын 47 000 ұпаймен бірінші орында тұр, ал Мамедли 45 000 ұпаймен екінші орынға жайғасты. Үшінші орынды армян балуаны Карен Асланян (31 000 ұпай) иеленді.

Еркін күрестен Қазақстандағы үздік көрсеткіш Нұрқожа Қайпановқа тиесілі — ол 70 келіге дейінгі салмақта әлемдік рейтингте екінші орынға көтерілді. Албанияда өткен әлем чемпионатында Қайпанов финалда жапон балуаны Ёсиносуке Аоягиді жеңіп, алтын медальге ие болды.

Әйелдер арасында ең жоғары жетістікке Жамиля Бақбергенова қол жеткізді. Ол 72 келіге дейінгі салмақ дәрежесінде әлемдік рейтингтің екінші орнында орналасқан. 2024 жылғы әлем чемпионатының финалында қазақстандық балуан жапон спортшысы Ами Ишиге жол берді.