Тағы да есірткі: Астанада ер адамнан жүздеген құты тәркіленді

Астанада ер адамнан есірткі заты салынған 562 дана пластик құты тәркіленді. Бұл туралы Azattyq Rýhy агенттігі Polisia.kz-ке сілтеме жасап хабарлайды.

Есірткі қылмысына қарсы іс-қимыл басқармасының қызметкерлері кезекті есірткі сатушының заңсыз қызметін тоқтатты. Жедел-іздестіру іс-шараларын өткізу шеңберінде тәртіп сақшылары елордаға «каннабис майы» есірткі затын жасырын тарату мақсатымен келген 24 жастағы азаматты ұстады.

Жігітті ұстаған кезде тінту барысында киімінің сол жақ қалтасынан салмағы 21 грамм болатын «каннабис майы» есірткі заты бар 10 пластикалық құты табылды. Әрі қарай тергеу әрекеттері барысында пәтерді тінту нәтижесінде ас үйдегі сөреден полиэтилен пакеті тәркіленді, оның ішінде салмағы 270 грамм «каннабис майы» есірткі заты бар 552 дана пластик құты болды. Тәркіленген есірткінің жалпы салмағы шамамен 300 грамм.

Ер адамға қала аумағында есірткіні тарату бойынша «Telegram» әлеуметтік желісі арқылы «жұмыс» ұсынылғаны анықталды. Аталған факті бойынша қылмыстық іс тіркелді.