Вашингтонда мереке кезінде атыс болып, 9 адам жарақат алды

Вашингтонда АҚШ халқы Тәуелсіздік күнін тойлап жатқан кезде атыс болып, тоғыз адам жарақат алды, деп хабарлайды Azattyq Ruhy.

Бұл туралы қала полициясы бастығының көмекшісі Лесли Парсонс Twitter-де жариялады.

Оның айтуынша, жараланғандардың арасында балалар да бар.

«Оқиға салдарынан тоғыз адам жараланды. Олардың екеуі – кәмелетке толмағандар: біреуі тоғыз жаста, екіншісі 17 жаста», - деп жазды ол.

Атыс АҚШ астанасының солтүстік-шығысында 5 шілдеге қараған түні болған. Зардап шеккендердің кейбірі ауруханаға жатқызылды. Қазіргі уақытта олардың өміріне қауіп төніп тұрған жоқ.

Вашингтондағы полиция бастығының көмекшісінің айтуынша, белгісіз ер адам жол талғамайтын көлікпен келіп, Тәуелсіздік күнін тойлап жатқан көпшілікке қарата оқ жаудырған.