Халыққа мемлекеттің бекемдігін, тұрақтылығын ойлайтын басшы керек – Айдар Әміребаев

Философия, саясаттану және дінтану институты Саяси зерттеулер орталығының директоры Айдар Әміребаевтың айтуынша, қоғамға сайлау алдындағы тартыстан гөрі, тұрақты мемлекетті жүзеге асыратын кандидатты сайлау маңызды, деп хабарлайды Azattyq Ruhy.

«Биыл сайлау алдында нағыз саяси тартыс, саяси бәсеке бола ма?» деген сұрағымызға жауап бере келе Айдар Әміребаев халық арасында байқаған жайттар туралы айтып берді.

«Қарап тұрсаңыз, қазір бүкіл әлемде тұрақтылық жоқ. Жан-жағымызда түрлі қақтығыстар, соғыстар болып жатыр. Халық қазір ақпараттық кеңістіктегі тартыстың өзінен шаршаған сияқты. Менің ойымша, солай. «Қаңтар оқиғасынан» кейін халықтың қалайтыны – тұрақтылық сияқты. Әлеуметті, қоғамды алып қарасақ, менің ойымша, тартыстан гөрі, тұрақты, өз-өзіне сенетін, мемлекеттің әлеуетін жүзеге асыратын адам сайланса, жетіп жатыр. Өзім де қарапайым халықтың өкілімін, өзімнің байқағаным – осы. Халыққа мемлекеттің бекемдігін, тұрақтылығын, әл-ауқатын ойлайтын басшы, соған қарай нақты іс-әрекет жасайтын, жауапкершілігі мол билік керек», - дейді Айдар Әмребаев.

Оның айтуынша, қазақ елінің өз даму жолы бар, ал сырттан келген күштердің демократия туралы айтқандарын біз кейде басқаша түсінеміз.

«Меніңше, біз кейде демократияны басқаша түсінеміз. Оппозиция өкілдері немесе сырттан келген күштер тартысты, соғысты, бәсекелестікке түсудің басқа жолдарын демократия деп, «сендердің жүйелерің дамыған мемлекеттердің жүйесіне жетпейді, өзгерту керек» деп жатады. Меніңше, біздің қазақи, өз жолымыз бар», - дейді ол.

Айдар Әміребаевтың пайымынша, қазір Қазақстанда тұрақтылықты қамтамасыз ете алатын, қиын-қыстау кезде халықты тастап қашып кетпеген, халықаралық аренада беделі мол, саяси мығым кандидат ол – қазіргі Президент Қасым-Жомарт Тоқаев.

«Билікке саясаттағы тәжірибесі мен саяси беделі аз адам келсе, ол тағы бірнеше жылға созылатын тұрақсыздық болады», - дейді ол.

Ал бір адамның бір рет жеті жыл мерзімге ғана сайлануы туралы сауалымызға пікір қосқан Әміребаев «қазіргі Президент Қасым-Жомарт Тоқаев ұмтылып жатқан «жаңа Қазақстанға» мүмкіндік беру керек» дейді.

«Тоқаев Конституциялық өзгерістерді енгізген кезде суперпрезиденттік жүйені бұзып, жаңа жүйеге, «жаңа Қазақстанға» көшуді ойлады. Жалпы, осы «жаңа Қазақстанға» бір мүмкіндік беру керек. Бұл ретте, бір адамның жеті жылға ғана сайлануы дұрыс шешім болар еді деп ойлаймын», - деп түйіндеді сөзін ол.