Қасым-Жомарт Тоқаев Google-да жұмыс істейтін қазақ қызымен не туралы сөйлесті?

Қазақстан Президенті Қасым-Жомарт Тоқаев Америка Құрама Штаттарындағы жұмыс сапары аясында осы елдің IT саласында еңбек етіп жүрген қазақ мамандармен кездесті, деп хабарлайды Azattyq Ruhy.

Тоқаев кездесуге қатысқан қазақстандықтар арасынан инженер-бағдарламашы Арай Сабыржанды сөзге тартты.

«2017 жылы Халықаралық ақпараттық технологиялар университетінде компьютер саласының бакалавр дәрежесін алып, 2018 жылы Сан-Франциско қаласына келдім. Бұл жерде біраз стартап компанияларда жұмыс істедім. Қазір Google компаниясында виртуалды машиналардың бағдарламашысы болып жұмыс істеп жүрмін», - деді Арай Сабыржан Президентке өзі туралы айта келе.

Тоқаев Арайдың Алматыда қандай университетте білім алғанын нақтылап, «Google компаниясындағы келісімшартың қысқа мерзімді ме?» деп сұрады.

«Жоқ, толыққанды келісімшарт», - деген Арайдың жауабын естіген Президент оны елге шақырып, келетін болса, бірден үкіметке шақырамын дегенін ішара танытты.

«Қазақстанға қайта келсеңіз мен сізді үкіметке.... Енді байланыста боламыз ғой. Америка жақсы, бірақ менің ойымша, Қазақстанда да жұмыс істей аласыз», - деді Тоқаев сөз соңында.

Естеріңізге сала кетейік, бұған дейін хабарлағынымыздай, Қасым-Жомарт Тоқаев Қазақстан-Америка инвестициялық дөңгелек үстелінің жұмысына қатысқан.