Алматыда бояу өнімдері тұрған гараждан өрт шықты

Алматының Әуезов ауданында лак-бояу өнімдері тұрған гараждан өрт шықты. Бұл туралы Алматы қалалық Төтенше жағдайлар департаменті мәлім етті, деп хабарлайды Azattyq Rýhy.

Департамент мәліметінше, өрт 11 шілде күні сағат 15:26-да Ақсай 1А шағын ауданында болған.

«Өрт сөндіру бөлімшелері оқиға орнына 4 минутта жетті. Бұл кезде жалпы аумағы 25 шаршы метр болатын жерасты типті гаражда қалбыр ыдыстағы бояулар өртеніп жатты. Қою түтін мен температураның жоғары болуына байланысты өрт сөндірушілер тыныс алу аппаратымен жұмыс істеді. Барлау барысында өрт ошақтарын анықтау үшін тепловизор да қолданылды. Өрт сағат 16: 19 минутта оқшаулауланып, 21 минуттан соң толығымен жойылды. Өрттің көрші гараждарға таралуына жол берілмеді», - делінген хабарламада.

Өртті жоюға ТЖД-ның 24 қызметкері мен 4 техникасы жұмылдырылды.

Өрт болған жерде анықтаушылар жұмыс істеуде.