Елімізде ЖОО-дан кейінгі білім беру саласына өзгерістер енгізілді

Azattyq Rýhy

Бір ғылыми жетекшіге 15 докторант бекіту тәжірибесі дұрыс емес

Елімізде ЖОО-дан кейінгі білім беру саласына өзгерістер енгізілді
Фото ашық дереккөзден

Білім және ғылым министрі Асхат Аймағамбетов жиналыста жоғары оқу орнынан кейінгі білім беру бойынша кейбір мәселелер талқыланғанын айтты. Бұл туралы ол Telegram каналында мәлім етті, деп хабарлайды Azattyq Rýhy.

«Келесі ұсыныстар айтылды:

1. Докторанттарға Қазақстан тарихы, қазақ философиясы, Қазақ тілі мен әдебиеті сияқты гуманитарлық бейіндегі бірқатар бағыттың ерекшелігін ескере отырып, қолданыстағы талаптарға (WоS және Scopus тізбесіне кіретін басылымдарда мақалалар жариялау) бірнеше балама нұсқаларды қосу ұсынылды.

Атап айтқанда:

а) КОКСОН тізіміне енгізілген журналдарда 5 мақала және ғылыми конференциялардан 2 материал;

б) сенімді баспаларда монография шығару (Elsevier, Brill, CRC Press, DeGruyter, Edward Elgar Publishing, Springer Nature және басқалары), сондай-ақ US News Best Global Universities Rankings, Academic Ranking of World Universities немесе Times Higher Education World University рейтингінің топ-100 құрамына кіретін университеттерде», - деп жазды министр.

Ол сөзін жалғай отырып, былтыр КОКСОН тізіміне енгізілген ғылыми журналдарға қойылатын талаптар едәуір күшейтілгенін және тізімнен әлсіз журналдарды алып тастап, ескі тізімді толығымен жаңартылғанын, сол себепті бұл шешімді жұмыстың қисынды жалғасы деп санайтынын айтып өтті. Әрине, толыққанды дәйексөз жүйесі бойынша жұмыс созылып кетті, бірақ соған қарамастан оның қорытындысы шығарылады.

«2. Сондай-ақ, WoS және Scopus тізіміне енгізілген және санкцияға байланысты деректер қорынан жойылған ғылыми журналдарда гранттық қаржыландыру аясында жарияланған қазақстандық ғалымдардың мақалаларын, егер бұл мақалалар бұған дейін жариялануға қабылданған болса, оларды тану мүмкіндігі талқыланды», - деді ведомство басшысы.

Бұдан бөлек, енгізу мерзімі кейінге шегеріле отырып, (2023 жылдан бастап) мынадай шаралар ұсынылды:

  1. Докторанттарды қабылдау бойынша. Докторантураға түсу кезінде үміткерлерге өздерінің болашақ диссертациясының ғылыми негіздемесін (research proposal) ұсыну ұсынылды.
  2. Докторанттардың зерттеу құзыреттілігі бойынша. Бұған дейін біз докторанттардың «Академиялық хат», «Ғылыми зерттеу әдістері» пәндерін міндетті түрде оқуын енгіздік. Бұл құзыреттер кез келген докторантқа ғылыми зерттеулерді өз бетінше орындау үшін қажет. Осы пәндерді меңгеру үшін біліктілік емтиханын өткізу ұсынылады.

«3. Ғылыми басшылық бойынша.

Бір ғылыми жетекшіге 15 докторант, кейін біріншісі қорғаудан өте алмаған жағдайда тағы бесеуін бекіту тәжірибесі дұрыс емес. Бүгінгі таңда ғылыми жетекшілер көп жағдайда докторанттармен жұмыс істеуге жеткілікті көңіл мен уақыт бөлмейді. Бұл мәселені шешу үшін жүйелі шаралар қажет.

Осы ұсыныстарды қосымша сараптама мен талқылаудан өткізгеннен кейін нақты шешім қабылданады», - деді Асхат Аймағамбетов.

×
Бұл желілік ресурстың ақпараттық өнімдері 18 жастан асқан адамдарға арналған.