Өзбекстан СІМ басшысы: Біз Донецк пен Луганскты жеке республика ретінде мойындамаймыз

Сыртқы істер министрі өз сөзінде Украинадағы оқиғаларға тоқталып, жағдайға қатысты Өзбекстанның ұстанымын жеткізді. Бұл туралы Azattyq Rýhy UzNews басылымына сілтеме жасап хабарлайды.

«Біріншіден, Украинадағы жағдай Өзбекстанды алаңдатып отыр. Екіншіден, Өзбекстан бұл жағдай бейбіт жолмен және дипломатиялық жолмен шешілгенін қалайды. Ал ол үшін, ең алдымен, қақтығыстар мен зорлық-зомбылық жақын арада тоқтауы керек», - деді Абдулазиз Камилов.

Ол Өзбекстанның Ресей Федерациясымен де, Украинамен де көп жоспарлы қарым-қатынаста екенін атап өтті.

«Ұлттық мүдделерге сүйене отырып, Өзбекстан екі елмен өзара тиімді ынтымақтастықты жалғастырады. Біз осындай қиын-қыстау кезеңде Украинаға гуманитарлық көмек көрсетуді ары қарай да жалғастырамыз», - деді Өзбекстанның сыртқы істер министрі.

Абдулазиз Камилов сонымен бірге Өзбекстан Украинаның тәуелсіздігін, егемендігін және аумақтық тұтастығын мойындайды деп мәлімдеді.

«Біз Донецк пен Луганскты жеке республика ретінде мойындамаймыз», — деп қосты министр.