Антикор полициядан қашқан қызметкерінің тергеу ісіне қатысты түсінік берді
Қазіргі уақытта заң бұзған қызметкер ауруханада жатыр
Сыбайлас жемқорлыққа қарсы іс-қимыл агенттігі өз қызметкерінің заңсыз іс-әрекеттері фактісі бойынша қызметтік тергеу барысы жайлы түсінік берді. Бұл туралы агенттіктің баспасөз қызметі мәлім етті, деп хабарлайды Azattyq Rýhy.
Сыбайлас жемқорлыққа қарсы іс-қимыл агенттігі төрағасының бұйрығына сәйкес, Агенттіктің жеке қауіпсіздік департаменті Қарағанды облысы СЖҚА Жезқазған өңірі бойынша Ауданаралық сыбайлас жемқорлыққа қарсы іс-қимыл басқармасының аға офицері Д.Т. Кудикеновтің заңсыз іс-әрекеттері бойынша қызметтік тергеу жүргізуде.
«Қазіргі уақытта Қарағанды облысы Жаңаарқа ауданының сотымен ҚР ӘҚБтК-нің 608-бабы 3-бөлігі (мас күйінде ЖКО жасау), 611-бабы 2-бөлігі (ЖКО орнын қалдыру) және 613-бабы 1-бөлігі (көлік құралын тоқтату бойынша полиция қызметкерлерінің заңды талаптарына бағынбау) бойынша Д.Т. Кудикеновке қатысты әкімшілік материалдар қарастырылуда. 2022 жылғы 7 ақпаннан бастап қазіргі уақытқа дейін Д.Т. Кудикенов «Пневмония» диагнозымен ауруханада жатыр. Осыған байланысты, «Құқық қорғау қызметі туралы» Қазақстан Республикасы Заңының 58-бабы 4-тармағына сәйкес Д.Т. Кудикеновке қатысты қызметтік тергеу тоқтатылды. Ол жұмысқа шыққаннан кейін қызметтік тергеу қайта басталып, Д.Т. Кудикеновке қатысты тиісті шешім қабылданады», - делінген ведомство хабарламасында.
