Ауыл шаруашылығы өнімдерін өндіру көлемі төмендеп кетті − ҰЭМ

Ауыл шаруашылығында өндіріс көлемі екі есе төмендеді деп хабарлайды Azattyq Rýhy тілшісі.

Бүгін Үкімет үйінде Ұлттық экономика министрі Әсет Ерғалиевтің айтуынша, ең төмен көрсеткіштер Қостанай (14,1%-ға төмендеу) және Ақмола (10,9%-ға) облыстарында болып отыр.

«Саладағы өндірістің оң өсуі 9 өңірде тіркелді. Ең жоғарғы өсуді Павлодар (7,1%-ға өсу) және Шығыс Қазақстан (5,1%-ға) облыстары көрсетті», − дейді министр.

Оның айтуынша, ауыл шаруашылығы кешенінде өнімнің жоспарланған сату көлемдерін және құрылыс саласындағы кезеңнің уақытында бітіруін қамтамасыз ету маңызды.

Белгілі болғандай, биылғы 10 ай қорытындысы бойынша құрысылыс саласы 7,6%-ға өсім көрсеткен. Құрылыс-монтаждау жұмыстарының ең жоғары өсуі Маңғыстау (22,8%-ға өсу) және Ақмола (16,9%-ға) облыстарында, сондай-ақ Алматы қаласында (22,2%-ға өсу) байқалады.

Тұрғын үйді пайдалануға беру бойынша Шығыс Қазақстан (36,6%-ға өсу) және Қостанай (25,5%-ға) облыстарында, сондай-ақ Шымкент қаласында (23,7%-ға) өсім байқалады.

Еркежан Айтқазы, Нұр-Сұлтан қаласы