Мұнайдан түскен салық екі есе артты

Биылғы 9 айдағы көрсеткіш бойынша мемлекеттік бюджетке 7 538,2 млрд теңге салық түсті хабарлайды Azattyq Rýhy тілшісі.

Бұл көрсеткіш өткен жылмен салыстырғанда 30,8%-ға артық. Биыл жергілікті бюджетке салықтан түскен түсім де өскен - 2 617,7 млрд теңге. Былтырғымен салысытырғанда 21,1%-ға өсім бар.

Республикалық бюджетке түскен салықтың көп мөлшері мұнайға салынатын экспорттық кеден баж салығы есебінен. Бұл 352,5 млрд теңгені құрайды. Аталмыш көрсеткіш былтырғыға қарағанда екі есе көп. Корпоративті табыс салығы - 390,8 млрд теңге, ЕАЭО елдерінен импортқа қосылған құн салығы - 171,5 млрд теңге, үшінші елдерден импортқа қосылған құн салығы - 105,2 млрд теңге, пайдалы қазбалардың өндірісіне салынатын салығы - 103,7 млрд теңге.

Салық түсімінің өсуіне экспорттық шикізат бағасының өсуі әсер еткен. Оның ішінде мұнай 64,5%-ға, мыс 57,3%-ға, алюминий 44,2%-ға, мырыш 34%-ға, күміс 33,8%-ға, қорғасын 19,7%-ға және алтын 3,8%-ға өскен.

Сонымен қатар, үшінші елдермен тауар айналымы да артқан. Биыл күзге дейін экспорт 18,2%-ға өссе, импорт 9,3%-ға төмендепті.

Еркежан Айтқазы, Нұр-Сұлтан қаласы