10 желтоқсаннан бастап Түркияға әуе рейсі азаяды
Сонымен қатар Өзбекстанға ұшақ қатынасы жанданады
Қазақстан Түркияға әуе рейсін екі есе қысқартып, Өзбекстанмен әуе қатынасын жандандырады, деп хабарлайды Индустрия және инфрақұрылымдық даму министрлігі.
«10 желтоқсаннан бастап Қазақстан және Түркия арасындағы екі елдің әуе компаниялары орындайтын рейстер саны аптасына 20-дан 10 рейске дейін қысқартылады. Рейстер екі елдің санитарлық-эпидемиологиялық талаптарын қатаң сақтай отырып, әуе компанияларының сайттарында жарияланған кестеге сәйкес орындалады. Қазақстан және Түркия әуе компанияларының рейстер кестесіндегі өзгерістер туралы әуе компанияларының анықтама қызметтерінен немесе билеттерді сатып алған орындардан нақтылау керек», - деп жазылған хабарламада.
Сонымен қатар 10 желтоқсаннан бастап Нұр-Сұлтан мен Ташкент арасында әуе рейстері қайта жанданады. Екі мемлекеттің арасында аптасына екі рет ұшақ ұшады.
