Іле өзені маңында өрт шықты: сөндіруге тікұшақ жұмылдырылды

Алматы облысының Еңбекшіқазақ ауданында, Нұрлы ауылынан шамамен 20 шақырым жерде құрғақ шөп пен қамыс өртенді. Өрт Іле өзеніне жақын ашық аумақта шыққан, деп хабарлайды Azattyq Rýhy.

ҚР ТЖМ баспасөз қызметінің мәліметінше, батпақты әрі жетуі қиын жер бедері және кіреберіс жолдардың болмауы өрт сөндіру жұмыстарын қиындатып отыр. Өрт сөндіру және ауыр техниканың өтуі үшін мамандар арнайы жол салып жатыр.

Өртті сөндіруге 70-ке жуық адам, 21 техника және «Қазавиақұтқару» тікұшағы жұмылдырылған. Төрт өрт ошағының үшеуі оқшауланды. Төртінші ошақтағы өртті сөндіру жұмыстары күшейтілген режимде жалғасып жатыр.

Оқиға орнында жедел штаб жұмыс істеп жатыр. Жағдай Қазақстан ТЖМ бақылауында.