Түркістан облысында лицензиясыз жұмыс істеген дәріхана анықталды

Түркістан облысының полицейлері лицензиясыз жұмыс істейтін дәріхананы анықтады, деп хабарлайды Azattyq Rýhy тілшісі Polisia.kz-ке сілтеме жасап.

«Карантин кезінде сұранысқа ие дәрі-дәрмектер мен медициналық құралдарды кейбір азаматтар мен дәріханалардың заңсыз сату фактілерін анықтау бойынша рейдтік және алдын алу іс-шаралары аясында Түркістан облысы ПД қызметкерлері жоғары бағамен дәрі-дәрмектерді заңсыз сатудың жолын кесу жұмыстарын жалғастыруда. Мысалы, Жетісай АПБ-не жергілікті базарлардың біріндегі дәріханада дәріні жоғары бағамен сатып жатқандығы туралы хабарлама келіп түсті. Тексеру кезінде Түркістан облысының Жетісай қаласындағы базар аумағында фармакологиялық қызметпен айналысуға лицензиясы жоқ дәріхана жұмыс істейтіні анықталды», - деп жазылған ақпаратта.

Нәтижесінде, полиция қызметкерлері түрлі дәрілік заттардың 558 орамасын тәркіледі. Жинақталған материалдар заңды шешім қабылдау үшін тиісті органдарға жіберілді.